Tá fáilte curtha ag an bhFeisire Eorpach Cynthia Ní Mhurchú roimh théama Lá Eorpach na dTeangacha 2026, is é sin “Is iad na teangacha a thugann le chéile sinn!”
Mar dhuine a bhíonn ag úsáid na Gaeilge go leanúnach ina cuid oibre ó toghadh chuig Parlaimint na hEorpa í in 2024, deir Ní Mhurchú gur ‘meabhrúchán tábhachtach den éagsúlacht atá i gcroílár na hEorpa’ é Lá Eorpach na dTeangacha.
Bhunaigh Comhairle na hEorpa tús an lá in 2001 mar dheis chun ceiliúradh a dhéanamh ar na teangacha ar fad atá san Aontas agus chun an t-ilteangachas a chur chun cinn.
Deis atá sa lá don Fheisire Eorpach aird a tharraingt ar an tábhacht a bhaineann lena chinntiú go gcaitear leis an nGaeilge mar an gcéanna leis na 23 theanga oibre oifigiúla eile de chuid an Aontais
Tá maolú i bhfeidhm don Ghaeilge faoi láthair go dtí 2029, rud a chiallaíonn go bhfuil stádas tánaisteach aici mar theanga oifigiúil de chuid an Aontais. Dá bhrí sin, tá seirbhísí teoranta ann don teanga, rud a chiallaíonn nach féidir leis na Feisirí Gaeilge a labhairt go leanúnach toisc nach féidir a chinntiú go gcuirfear ateangaireacht ar fáil.
“Ar Lá Eorpach na dTeangacha, ba cheart dúinn ceiliúradh a dhéanamh ar an gcaoi a tharraingíonn teangacha le chéile muid – agus a chinntiú go mbíonn na háiseanna céanna ag gach teanga, an Ghaeilge san áireamh.
Iarraim ar mo chomhfheisirí agus ar ionadaithe poiblí uile na hÉireann an teanga a úsáid chomh maith agus is féidir leo, go háirithe agus Uachtaránacht Chomhairle an Aontais Eorpaigh ag Éirinn.”
